Rom 15 | BEF | STEP | Lenali Hu'mamofihi keheli amuya nemalanamagita bona'i komopa'anigu keheli bati mehanamagihi ketana'ani kofi epelete enehe'malo. Ya hite, lagatini lepesise'nalo mege'i memalalo.

Romans 15

Kilisitohi hapa'alo mege'i malalatamofihi ka'a

1 Lenali Hu'mamofihi keheli amuya nemalanamagita bona'i komopa'anigu keheli bati mehanamagihi ketana'ani kofi epelete enehe'malo. Ya hite, lagatini lepesise'nalo mege'i memalalo. 2 To bona'i keheliya meina'a keta epesilina nasana yamofihi lenali enele'mo bati hilo. Bonatinimagihi lenogotinifihi suhi huto nohigo Kilisitotoga enele'mo hetofa hite amuya melenogo ya bati huto huto hilina'mu yabe. 3 Hena'mube? Kilisitou laga'a besi'ehinalo mege'i memolo'ehina yabe. Ai kumu mono bukugu fayahi keye'ahana:Bona'magi huli ka lu kimi'ahana yamofihi aku'i nanitoga ana huto huto hu'ehina yabe. 4 Ya'ma koyapa'i mono bukugu fayahi ge'ahanamofihi asaga kagauba Hu'mamofihi biluta kapo'mu lelepito bu megose'namofihi geba huto mino lito buto lele'mo amuya malalina'mu yabe. 5 To Hu'mau lenele'mo bati hilata to lenele'mo amuya mololata bouba lenele'mo agoya hinogo lenali Yesu Kilisitohi hapa'a babeyafalo mege'i melete koguna ite moneko bona'i hite minalabe. 6 Ya hinogomo lenali asaga'i moneko'na hite lenonogotini Hu'mamofihi kanipo filana'mu yabe. Sipi Boti Yesu Kilisitohi afo'afitoga lenegelo bilabe. Ya'ma aitoga loka ho lepoloto nunumu nohube.

Ka lamana'a fegutoga bona'magitoga huto hilibe.

7 To Yesu Kilisitou lenele'mo'ehina'mu lenali ana hite Kilisitohi bona'a enebe tigite folagahatinigu nehana ya'ma komopatini epilo. Ya hilenogo Hu'mamofihi gi'amu hofa talibe. 8 Nani lu nolepube. Kilisitou Yuta bona'magihi enehe'malibe luto koko pana'ani lolo hilube'mu o'ehina. To henabe lutobe? Ai Hu'mau koyapa'i Yuta bona'magihi tata'anifitoga kaga molo'ehinana ya'ma le'mo huto hilibe luto yabe. Ya huto Hu'mamofihi hapa'a bebe salina'mu to lamana ka'a beto huto epilube'mu kokulumaguti limito o'ehina yabe. 9 To fegutoga bona'magi Hu'ma ginaga fi epigo aitoga enegelo bilabe luto o'ehina yabe. Ana ginaga fise'namu mono bukugu fayahi keye'ahana:

Nani fegutoga bona'i nehanalo
kai kumu negelo bilunagihe.
Kigika liyafa huto
kanipo fise nama lilunagihe.

10 To ana huto kaga mone hiti ni'ibe:

Fegutoga bona'magita lenegelo bilo.
Lenali hiti to Yuta bona'i
Hu'mau enele'mo ho ti'ehina'amagi hiti
ai kumu lenegelo bilo.

11 To mone hiti ni'ibe:

Fegutoga bona'magi lenali asaga'i
Sipi Bomu'i lenofokehi halo.
Yege yege boana'magita aitoga babu lite
lenegelo bilo.

12 To lu huto huto bo, Aisaiyau ana huto Kilisito kumu ma luto fayahi go'ehina:

Bo moneuba
Tebitihi afo'afihi Yesehi naga'i
huto huloto
fegutoga bona'magihi kibina bo
lolo hilibe.
Ya nohinogomo
enali ai lele'mo bati hilina bo yabe lite,
keheli emite geba hite
komopa'ani aitoga mele melete minalabe.

13 Nani Hu'mamofihi loka noho lepolobe. Lenali Hu'mamofihi keheli ule'ale hite neminenogo ai'a gelo bise'na to fuluna'a hiti lenalitoga huto hinogo lenifita ilata nehana'a mone hiti le'mo hofa talina'mu yabe, nolube. To Sikalafu'uba lenele'mo amuya melenogo lenifita ilete kanihi sipi fino, luto nolube.

Polu lesa melu'ehina kaga fayahi koyo'ehinamofihi hapa'a

14 Nalalu'nigitabe, lenali lamana bona'i nehite to mono ka keheli fe lite to mono kaga ai lu emigo ai lu emigo hilana bati hite ya nehago yamofihi keheli ule'ale nohube. 15 Keheli'ohunaya aku'i lenali kumu koli mehuse nohuto'ni mone kaga amuya ka luto ya'ma fayahi koyoto nolepube. Lenali ana kaga beto hilabe luto amuya moloto akoyo'ohuna. Hu'mau lili'nalo bona'a nele'mo ho tito Yesuhi kaga lelili huto buto fegutoga bona'magihi lu epilane luto noho lifigo nani nelesa melulata nohinagihe. 16 Nani Yesu Kilisitohi lili'nalo bo nohunagi nani fegutoga bona'i Hu'mamofihi baga'aguti lamana ka lito lu yege ho epologo keheli'ahanaya, enali mamufa molo emi'ehina suhi hite nehabe. To nani lusa gilata bo suhi huto nohube. To Sikalafu'uba enele'mo bati hinogo Hu'mau fokehi luto, enele'malube ligo ya'ma mono bona'i lolo huto lili'na nolube. 17 Ya hina'mu nani Yesu Kilisitotoga hepito nehe'mago Hu'mamofihi lili'na'a li'ohunana'mu negelo nobito nugufa'ni li saga nesi'asi nohube. 18 Ya'ma foya hena'ni huto lutita ni'ibe? Ya nohuto'ni nelesa meligo Yesu Kilisitou nehe'mago'ni fegutoga bona'magihi Hu'mamofitoga enele'mo'ohunamofihi kagasigo lu epilata nohube. Yesu Kilisitou nele'mo hetofa higo fegutoga bona'magihi mono ka keheliya ilabe luto foya'a li etoto mino'ohuna. Ya'mu keta mehuse huto lu lepilugi kehelilo. Nani ya'ma mono ka lu huto huse'a lu noepube. 19 To huse mehuse suhi huto ule'ale nasana lito oto mololoto nohuto Sikalafu'amofitogati amuya liloto topa hose'na'a hiti lilenogo kehelilabe. To nani Yelusale hepatogati hapi fito Kilisitohi ka lamana'a asaga'i lu huto holito buba buba huto ya'ma me'i le'mo bego bego huto Ililikamu metoga buto lu yege ho'ohuna. 20 Ya hina'mu tafa'agu aku'i li gulufu hilube luto Kilisitohi ka lamana'auba buto bu nehe meti'ehina kosabalugu ana ka'a lu huto epilube luto amuya mololata hu'ohunaya hapa'ni ya ni'ibe. Yana'mu fato bouba kohe toto ka lamana'a lu epito molo'ehinamofihi hepato henabe luto bilube? Yanalo mebilube'mu nohuna yabe. 21 Yanana'mu mono bukugu fayahi mone ge'ahanamo ni'ibe:

Enali ai kumu lu meepi'ahana bona'magi
aku enali be galana'mu yabe.
To ai kumu mekeheli'ahana bona'magi
aku keheliya ilana'mu yabe.

Polu Lomu bonatoga bilube'mu nohina ka

22 Ya'ma nani ka lamana'a mekeheli'ahanamagihi lu yege haluna'mu lenali Lomu hepatoga nehanalo bilube'mu hunaya aku babu yupahi mebu'ohuna yabe. 23 Ya nohugo mana hepatoga ka lamana'amofihi lili'na asu hago, nani babu foya kanagu lenalitoga bilube'mu nohunagi yatai ya biluna yupahi geba huto nekesa nokehelube. Nani Sepeni melugu bilube'mu nohuto kohe toto lenali yata'a nehetito lenali hiti nesi'a kanagu bati huto minolenogo laga'ni nebesilibe. Yalo lenali nehe'mete noho lifinogo aku'i kapo moloto Sepenigu bilube. 25 Ya bilunamoya yatai nani ma'asi Hu'mamofihi bona'a Yelusale hepalugu nehanamagihi enehe'malube luto enalitoga nobube. 26 Enali Yelusale hepatoga Hu'mamofihi bona'a mone'amagi enumuhi meni'ina nehago Masetonia hepato bona'magi hiti to Akaiya hepato bona'magi hiti li kehelite mone efaha'ani li nupa hite nimigo nani ana efahi lito Yesusale hepatoga bilube'mu hube. 27 Nani ana bona'i lu meepise nohugo enali'ani kaga lite kehelite efahi li nupa hi'ahana yabe. Lali Yelusale bona'i enehe'moto nona'a epilune lite li'ahana. Hena'mube? Yelusale bona'magi yata'a Yesuhi kaga'a lelite bite fegutoga bona'i lu epi'ahago kehelite mine bati nehana. Yana'mu fegutoga bona'magi Yuta bona'i enehe'melata nehanaya, bati huto ni'ibe. Enali Yuta bona'magihi kele kele'i fite efaha'ani epilanagi bati huto ni'inagihe. 28 To nani ana efaha'ani lito buto epito ya'ma lili'na su holenogo nani Sepeni melugu buloto lenali Lomu hepatoga nehanalo buto nehetilube. 29 To lenalitoga buto lenofotula hoto Kilisitou lusa gi lepalalina babu luto lenalitoga huto hilibe luto'ni ya'ma akeheli'ohuna yabe.

30 Nalalu'nigitabe, nani lenogo'na bito Sipi Boti Yesu Kilisito kumu yabe luto to ai'a Sikalafu'uba ginaga fi limise'namu yabe luto kehelilo. Lenali hiti nani hiti moneka nohune luto Hu'mamofitoga nunumu hite nani kumu le'mo amuya molobo lite yamofihi loka he netalo. 31 Nani Yelusale hepato bilube'mu nohugo bona'i Kilisitohi kaga mekehelite Yutia kapogu neminana mone'amagi nahalune'mu nehago nele'mo sibina hi lalagi nani kumu Hu'mau kaba hu netalina'mu aitoga loka halo. To Kilisitohi bona'i Yelusale neminanamagi nebe tigigo asaga kaga lu epilenogo kehelite enofokehi lilabe luto nolube. Yamofihi Hu'mamofihi loka he netalo. 32 Ya hinogo lenalitoga bilube'mu Hu'mau lu laga mehilenogo bilunagi nipa'nigu sipi negelo biloto lenali hiti nani hiti hepito bati huto minalune. 33 To Hu'mau, fuluna hapa'a nohina bouba lenali hiti minalina'mu yabe. Ma'naka.